Eurostar ընկերությունը, որը զբաղվում է գերարագ երկաթուղային ուղևորափոխադրումներով, հարցում է անցկացրել ուղևորների շրջանում և պատմել ճանապարհորդների ամենատարօրինակ սովորությունների մասին։ Ինչպես հայտնում է Lenta-ն՝ հղում կատարելով The Daily Mail-ին, ճանապարհորդները հաճախ են իրենց հետ վերցնում թեյի փաթեթներ, թեյնիկներ, հողաթափեր և ծածկոցներ։
Պարզ է դարձել, որ շատ հաճախ ճանապարհորդները իրենց հետ վերցնում են ավելի շատ իր, քան իրենց անհրաժեշտ է այդ ուղևորության համար։ Մեծ Բրիտանիայից հարցման մասնակիցների կեսը տանից իր հետ բերում է թեյի փաթեթներ (ֆրանսիացիներից այդպես անում է հարցման մասնակիցների մեկ երրորդը), իսկ ամեն հինգերորդը ուղեբեռում ընդգրկում է նաև թեյնիկ։
Հարցման մասնակիցները նշել են, որ իրենց համար շատ կարևոր է հարմարավետությունը ուղևորության ընթացքում, այդ պատճառով ճանապարհորդների ավելի քան մեկ երրորդը (36 տոկոս) իրենց հետ տանում են նաև տնային հողաթափեր, 23 տոկոսը չի դիմանում առանց տնային բարձի, իսկ 15-ը՝ առանց ծածկոցի։ Տղամարդկանց մեկ երրորդը խոստովանել է, որ տանից բերում է նաև վարսահարդարիչ։
Հանդիպում են նաև անսովոր իրեր․ Eurostar-ի աշխատակիցները նշել են, որ ճանապարհորդների ուղեբեռում նկատել են զրահ, 
օլիմպիական ջահ, միկրոալիքային վառարան:
Հարցման համաձայն՝ 25-ից 34 տարեկան ճարապարհորդների համար շատ կարևոր է կապի մեջ մնալը կամ ժամանացի հնարավորություն ունենալը երկար ուղևորությունների ընթացքում (որը տևում է շաբաթից ոչ պակաս), այդ պատճառով նրանք իրենց հետ վերցնում են նվազագույնը վեց գաջեթ։
Բացի այդ, հարցման մասնակից զբոսաշրջիկների 21տոկոսը նախընտրում է ուղևորության ընթացքում կրել ամենածանր հագուստը, որպեսզի ուղեբեռի քաշի ավելցուկ չունենա։
Ուսումնասիրության ընթացքում հարցում են անցկացրել ընկերության հազար հաճախորդների շրջանում։